عيون المجلس سياسية ،اقتصادية ،اجتماعية ،ليبرالية شاملة
خلود طباجه
..أيام زمان كانت قد إيه الحياة سهلة ومافيهاش تكاليف وقد إيه فعلا الناس كانت بسيطة وإزاى الجواز كان متيسر ومش معقد.
وكلمة (إحنا بنشترى راجل) كانت قد ايه مهمة بالنسبة لأهل العروسة ويكون أهم حاجة بالنسبة لهم ان جوز بنتهم يكون راجل بجد يقدر يصونها ويكون ضهرها فى الدنيا…
مش كل همهم هو المظاهر والتباهى قدام الناس بأن جوز بنتهم عنده عربية بكام ؟ولاشقة مساحتها قد إيه ؟ ولا عنده رصيد فى البنك ولا لأ ؟…
كانت حياة فعلا تقدر تعيشها من غير خوف من بكره والتفكير فيه لكن كانو بيعرفوا يعيشوا النهار ده ويكونو راضين ومبسوطين بيه.
لكن بقى نيجى للجواز بتاع النهار ده وحياتنا اللى احنا عايشينها دلوقتى اللى بقت كل حاجة فيها هى المظاهر…
وبقت كلمة (إحنا بنتشرى راجل ) دى النهار ده عبارة عن تدبيسة للعريس وجر رجلة وتوريطه فى الجوازة وتلاقى بعدها على طول قائمة الطلبات اللى مابتخلصش.
هتجيب شبكة بكام ؟ ,االشقة هتكون مساحتها قد إيه ؟ ,هتعمل الفرح فين ؟, وكله بقى الا النيش والنيش طبعا ده لازم يكون أساسى اللى إحنا لحد النهار ده مش عارفين إيه فايدته وبعد كل طلب تلاقى كلمه .. ده إحنا بنشترى راجل…قال يعنى هما كده بيثبتوك !. ونسترجع سوا أيام جوازات زمان . والتى تناولتها الأعمال المصرية السينمائية .. مارى منيب وهى بتختبر عروسة إبنها المنتظرة برلنتى عبد الحميد وهى تختبر أسنانها وشعرها وأشياء أخرى أيضاً !! ودى جوزات الصالونات .. والخاطبه ..
بس الجواز فى الأول وفى الآخر إذ كان جواز صالونات أو خاطبة أو عن حب لازم يكون فيه اتفاقيات بين العيلتين وتوافق وتقبل فكرى وعشان الجواز ده يكون ناجح لازم يكون فيه وضوح فى البداية.
لازم يكون فيه وضوح بينك ومابين شريكتك قبل الجواز وتناقشوا كل الأمور المتعلقة بالحياة الزوجية والمشاركة فى كل جوانب الحياة إذ كانت مادية أو معنوية.
وكمان إزاى تقدروا تحققوا مبدأ الخصوصية بين الشريكيين فى الحياة الزوجية .. ولازم انت وهى تبقى حياتكم مابين بعض وماتدوش فرصة لأى طرف تانى أنه يتدخل وتكونو فاهمين يعنى إيه هو الجواز وتقدروا الواقع وأن الجواز مش علاقة عابرة لا ده حياة كاملة حياتكما الأتنين وفقط انتما اللى تقدروا تبنوها ولازم تكون حياتكم هادية وتكونو أسرة مستقرة أساسها هو الحب والإحترام والتقدير والثقة… مع كل التقدير للتابوهات الجاهزة المستخدمة فى تلك الحالات .. قسمة ونصيب .. دون الدخول فى أساس المواضيع وبحث أصل المشكلة لضمان عدم الوقوع فيها بعد ذلك … وإن شاء الله وألف ألف مبروك !
