عيون المجلس سياسية ،اقتصادية ،اجتماعية ،ليبرالية شاملة
لمو الدايات كلها
نزل الولد مغصوب
وبالقماط معصوب
لفوه فى طرف التوب
عطس الولد عطسه
رفس الغطا رفسه
وشد الحيل
الدنيا ليل
وانا عيني مش شايفه
الدايا تضحك والجيران خايفه
والحال مريب
مفروض اكون باتولد عاشق حبيب
طب هو فين
مفروض يكون على الصفين أحباب
ويفتحولي الباب
تجري السنين ويجري بيا الشوف
أنا للسكك مشتاق
أنا ع الحياه ملهوف
متعبي جيبي بالطوفي والفنضام
متعبي قلبي بالوجع والخوف
ابن الظروف
والرصيف
والحلم
ابن المسألة الصعبة في عصر العلم
دراما وفيلم
وحالة سلم بين الناس بتولد حرب
وبياع كرب
يبيع فى الشرق مجاناً
ينام الغرب
لازم دايات يعني وفرح و سبوع
أديني جيت
لمو بقى الموضوع
وسيبونى اعيش من سكات
