عيون المجلس سياسية ،اقتصادية ،اجتماعية ،ليبرالية شاملة
محمد الشافعي
.. كتير بنسمع الجمله دى من ناس معينه ومش بنفهم ايه معناها او ايه وراها لأنهم فى الغالب بيبقي وراها حواديت وحكاوى منها الشيق ومنها المتعب ومنها العادى ومنها الأوفر بس مهما كانت الحدوته اللى ورا الجمله دى فى الأول والآخر كل اللى بنقابلهم فى حياتنا وبنعيش معاهم لحظات حلوة أو لحظات صعبه بتبقي تدابير من ربنا وربنا اللى كاتبلنا نقابل فلان ونصاحب علان ونعاشر فلان ونتخاصم مع علان..فترجع بعد كده تقول انك قابلت الشخص ده فى وقت غلط ,, بس غلط من وجهة نظرك انتا لكن ربنا شايف ان دا الوقت الصح اللى تقابل فيه الشخص ده
كتير من الناس اللى بتقابلهم في حياتك بيعلموا فيك ويسيبوا فيك الأثر الحلو أو الوحش اياً كانت الذكريات اللى بتطلع منها من الحدوته بتاعتك ,, بس عقلك الباطن بيصورلك انك كنت محتاج فلان ده فى وقت تاني غير الوقت ده ,, يمكن ساعتها حياتك تكون أفضل ,, وده مش اعتراض على تدابير ربك ,, ممكن يكون حلم او تخيل ان حياتك هتكون أحسن مع الشخص ده بس فى وقت تانى ومكان تاني خالص ..
تجاربنا الشخصيه وحياتنا مليانه بالحواديت الصعبه والمؤلمة للكل ,, بس اللى بيلعبها صح هوا اللى يعرف يستغل اللى حصل ويجمع وينقى الذكريات الحلوة بس ويفضل عايش عليها لكن الحاجات المؤلمة اللى تفكرك بالوجع ارميها بعيده مش محتاجنها دلوقتى ,, وده ليه ؟!! .. عشان تعرف تكمل حياتك ومتوقفش حياتك على مجرد ذكرى وحشه بتوجعك وبتأثر فيك بالسلب ,, وفى الأول والأخر الحياة مبتوقفش على حد ولا حتى بتقف على وقت معين أو ذكرى معينه
البني أدام السوى الصحيح هوا اللى يعرف يعمل من الفسيخ شربات زي ما المثل الشعبي بيقول وأختم كلامى بجمله اختلستها من صديق عزيز ومقرب ليا لما قالى “متفكرش فى اللى بيحصلك دلوقتى , وتقول يارب ده ليه واشمعنى انا اللى يتحط فى الظرف ده أو الموقف ده ,, كل اللى بيحصلك في حياتك ودنيتك اللى انت عايشه بأمر من ربنا وحده وبيبقي ربنا باعتلك من وراه رساله معينه ,, يمكن متفهمهاش دلوقتى وتفهمها بعدين ,, بس فى النهايه ربنا لطيف بعباده ,, وأوعى تفكر أن ربنا عاينلك حاجه وحشه بالعكس … ده بيبقي اختبار من ربنا ياتري هتانجح فيه ولا لأ”؟!….
