عيون المجلس سياسية ،اقتصادية ،اجتماعية ،ليبرالية شاملة
إسراءمحمد
.. (الراجل مابيعيطش)(لازم تجيب مجموع ) (المفروض تشرب اللبن )(ماتعيطيش قدام الناس)(الراجل مايخافش)(ايه اللي انتي لابساه ده؟) (وطي صوتك ) (ماتضحكيش) وغير ذلك كتير من قوانين اللازم والمفروض اللي بيحطه المجتمع علينا واللي بيعمل تشويه كبير فى إنسانيتنا. عشان تكتمل أنوثة البنت لازم على فكرة تبقى مسؤولة وجدعة. وعلشان تكتمل رجولة الرجل لازم يبقى حنين وطيب ويحتوي اللي قدامه. طب والمجتمع؟ دايما بيوصللنا عكس كده وعلشان كده، بقى فيه مشاكل كتير في مجتمعنا.
الجهاز النفسي زيه زي أي جهاز تنفسي أوهضمي له أعضاء بتكونه وهي المشاعر .بتكون كتير ومختلفه وبتكمل بعض زي القفل والمفتاح . ولو اختزلنا أي شعور منهم هايحصل خلل في التكوين النفسي ده فهنتعب أوي وقتها. لازم نحترم كل المشاعر ونديها حقها ونتقبلها زي ما هي. لأن مافيش حاجه ربنا خلقها مش مهمه حتى لو أحنا مش شايفين ده. صاحبتي مرة قالت جمله وهي زعلانه بس كانت في منتهى العبقريه قالت(إدوا المشاعر بأنواعها حقها). يعني زي ما بندي وقت للفرح لازم ندي وقت للحزن. بلاش لما نلاقي حد زعلان نقعد نزن عليه ونقول بطل زعل وخلاص بقى والكلام ده. ده مش معناه إننا نسيب نفسنا في الحزن أو أي شعور تاني بس لازم كل حاجه تكون باتزان علشان الحياة تكمل وتستمر.
(إن الله يحب إذا عمل أحدكم عملا أن يتقنه) و د. إبراهيم الفقي كان بيقول[ لما نعمل أي حاجه لازم نعملها صح ،لما تاكل كل صح،لما تنام نام صح .] وكمان لما تفرح أفرح صح وأفرح بجد. متسمعش كلام المجتمع اللي يقولك ده جنان أو أنت كده هتخرج من وقارك أو ده أهبل. لما تفرح أفرح بجد.زي إعلان كوكاكولا العبقري( لو ده جنان اتجنن ).وكمان لما تزعل ازعل صح. متسمعش كلامهم اللي يقول أنت كده هتأثر على نفسيتك او أوعى تعيط. الحزن بيقوي مش بيضعف. الحزن بيديك فرصه للتأمل وتحليل الأحداث. الحزن بيديك حكمه وعقل.ساعات كتير أوي بيكون النقطة الفاصله اللي بتغير حياتك للأحسن. لما تخاف خاف صح .لو مخفتش يبقى أنت مش إنسان.الخوف طبيعي ومطلوب. كان فيه مقوله مشهورة بتقول أن الشجاع مش الإنسان اللي مبيخفش بالعكس الشجاع هو الإنسان اللي قرر يتحدى خوفه. الخوف بيخليك تحدد أهدافك وترسمها صح . حتى الإشمزاز بيخليك ترتب أولوياتك وتحط قواعد لنفسك ولشخصك. يعنى لما تنكر وتشمئز من شخص بلطجي أو بيشتم، أنت بتحط معيار لنفسك أنك عمرك ما تحب تكون الشخص ده وهكذا.
سبحان الله دايما الحاجات بتتوجد من ضدها. يعني لو مفيش ضلمه مش هيبقى في نور ولو مافيش ضعف مش هيبقى فيه قوة. كل حاجه في الحياة بتكمل بعض بتدبير الإله العظيم اللي مخلقش حاجه هباء منثورا. وبالتالي عمرنا ما هنقوى إلا لما نضعف وعمرنا ما هننجح إلا لما نفشل وعمرنا ما هنفرح إلا لما نحزن.
كلمة السر في الحياة من رأيي إنها الإتزان . زي ما هو صحي إنك تدي مشاعرك حقها وتحترمها زي ما لازم تبقى متزن وحكيم . يعني ماتديش الحاجه أكبر من حجمها وأكبر من وقتها. و عود نفسك دايما أنك تفكر في الفرص اللي بتخلقها الحياة لينا لأننا ساعات كتير في الآخر بنقول رب ضارة نافعة.
