عيون المجلس سياسية ،اقتصادية ،اجتماعية ،ليبرالية شاملة
إسراءمحمد
..كل واحد فينا عايش بطل في حكايته، ومافيش حكايه بتكمل من غير كومبارس. ناس يمكن نحس إنهم مش مهمين أو حتى يمكن مش شايفينهم. بس الحقيقه إنهم مؤثرين جدا في الأحداث ومن غيرهم الحكايه عمرها ما تكمل.
زمايلك في الدراسه اللي أخرك تقوللهم صباح الخير أو بتشوفهم في المدرج بس، البقال اللي دايما بتشتري منه علشان جنب بيتك أو شغلك، السايس بتاع العربيات ، سواق التاكسي، البواب أو أي حد كومبارس بيأثر فيك من غير ما تحس. على الأقل أنت متعود تشوفهم كل يوم. بيكونو جزء من يومك غصب عنك. وبيساعدوا في تسلسل الأموروإنتظامها …
في مواقف معينه هتحسسك أد ايه هم أثروا فيك، وساعتها بتكون في قمة الإستغراب. كتير جدا بيكونو جنود من عند ربنا وسبب في تغييرك أو إرسال رساله ليك ، سواء بكلمة اتقالت أو موقف حصل قدامك أو أي حاجه .لو يوم حد فيهم غاب ،بتحس أن في حاجه غلط وأنت مش عارف تحددها. عقلك الباطن مش مستوعب غياب شخص من الصورة اللي عينك دايما شايفاها. لا قدر الله لو حد فيهم حصلله حاجه هتلاقي نفسك زعلان جدا وقلبك بيوجعك بالرغم أن مافيش بينكم علاقه تذكر.
غصب عننا بيكونوا عشرة من غير كلام كتير ولا علاقات .ده بالعكس الناس دي عادة كلامك بيكون معاهم محفوظ ومن غير ولا حرف زيادة ولا أقل. كونوا حاجه جوانا مالهاش اسم . يمكن تعود ، عشرة أو حاجه تانيه. المهم إنهم دخلوا جوانا من غير إستئذان. ومن غير ما نحس بقوا جزء من اللعبه اللي عايشين فيها.
خد بالك إنك كمان كومبارس في حياة غيرك. وكده كدة هتأثر في غيرك كتير ،حاول يكون تأثيرك إيجابي وإنتهز الفرص الضايعه. كلمه حلوة تتقال، نصيحه حد محتاجها، طبطبه في لحظه ضعف، ابتسامه أو مساعدة تقدر تقدمها أو خدمة و جدعنه .ماتستخسرش فيهم حاجه لأن كله هيترد ليك. ولازم تكمل دورك فى الدنيا حتى لو حتفضل كومبارس . و لو حتبقى صامت كمان !!
