عيون المجلس سياسية ،اقتصادية ،اجتماعية ،ليبرالية شاملة
إسراءمحمد
إختياراتنا في الحياة بتكون مختلفة بالرغم من إن إحتياجنا واحد. إختياراتنا بتكون قايمة على أساس مختلف كل واحد فينا بيبنيه لنفسه. زيها زي أي حاجه في الحياة بيبقى ليها ميزان معين ومعيار بنحدد و بنختار على أساسه .
المرجع اللي بنحطه لنفسنا دايما قابل للتغير والتعديل في أي وقت. ممكن لحظه معينه أو موقف يغير المقياس تماما. خبرتنا بتلعب دور كبير دايما في تحديد شروط المعيار بتاعنا.
في حاجات كتير بنحتاجها ربنا بيرزقنا بيها في الوقت الصح. ساعات كتير بنستغرب ونقول ليه ربنا مارزقنيش بحاجه معينه دلوقتي؟ .بنبقى حاسين أن هو ده الوقت اللي محتاجين فيه الحاجه دي، وطبعا بنحس كده بناء على المعيار اللي إحنا حاطينه. وبعد فترة ممكن جدا تكون مش كبيرة يحصلنا أي حاجه ونلاقي نظرتنا للأمور بدأت تتغير ، احتمال كبير تتحول ل 180 درجه.
بتحصل كتير أن لو إحنا امبارح هنختار حاجه ،ولو النهارده هنختار عكسها. ببساطه المعيار إتغير وإختلف. المعيار بتاعنا بيختلف من وقت للتاني وبيكبر معانا مع الزمن . ناس كتير بتندم من إختيارات جت في لحظه تسرع وكانت بمقياس ومرجع قديم. ومع مرور الزمن حصلت مشاكل من الإختيار ده لأن غصب عنهم معيارهم إختلف وده الطبيعي.
اختلاف المعيار شئ طبيعي وصحي لأنه بيدل إن الإنسان بيتطور ومش واقف مكانه. معناه إنه إتعلم فعلا من الحياة ونضج وبقى يعرف يتعامل مع الظروف ويشكل الهيكل الأساسي لحياته واحتياجاته. المعيار أصلا لازم يتغير ولو متغيرش يبقى مشكلة. بس ثواني ، ده معناه إننا كل شويه هنتغير يبقى هنندم علطول بقا ولا ايه؟. لا، مش معنى كده إننا هنندم على كل حاجه مع الزمن ،ببساطه في حاجات أساسيه بتكون المعيار لأي حاجه. عادة بناخدها من الدين والتربيه والباقي بيكون دور الخبرة والمشاعر والظروف.
أظبط المعيار. يعني الأهم من التغيير إنه يكون في الطريق الصح . أرجع للمرجع الاساسي ليك والأهم إنك متكابرش . لو معيارك غلط صلحه بطيب خاطر عشان متندمش طول حياتك.
