عيون المجلس سياسية ،اقتصادية ،اجتماعية ،ليبرالية شاملة
صباح أبو سته
في القرن 19 في فرنسا ، شابة اسمها ” إيميلي سيج ” كانت بتشتغل معلمة في مدرسة فتيات ، شخصية قوية جدًا ، ذكية ، و موهوبة .. و عندها مشكلة غريبة شوية .. عام 1845م اثناء انشغال ايميلي في احد الفصول ، لاحظت الفتيات بداية ظهور ظل غريب خلف إيميلي .. مكانش واضح بالبداية لكن في خلال دقائق ظهر اكثر و اختفى بعد شهور من الحادثة دي ، اثناء حصة ، الطيف الغريب ظهر مرة اخرى ، بس المرة دي ظهر كامل ، مرة واحدة ، و كان على شكل إيميلي بالظبط .. علشان منتلخبطش هنسمي الطيف ده ” قرين إيميلي ” ، تمام ؟ .. المهم ” القرين” بدأ يتحرك في الفصل بنفس اسلوب إيميلي ، بيقلد كل حركة السيدة الأصلية قامت بيها ، لكن من غير صوت ، الفصل كان فيه 13 فتاة ، ولكم أن تتخيلوا اللي حصل وقتها الغريب إن في المرتين كل الموجودات بالمكان شافوه ، ماعدا صاحبة الشأن ، ” إيميلي ” مشافتش قرينها نهائي .. بعد بحث الإدارة في ماضي ” إيميلي سيج ” ، إتضح إنها في خلال 6 سنوات ، اتفصلت من 19 مدرسة فتيات مختلفة .. 5 شهور مرت على التحريات و فيهم عدد مرات ظهور القرينة زاد .. أثناء وجبات الغداء ، كان القرين بقف خلف صاحبته للمراقبة فقط ، اثناء النوم كانت بيدور في الممرات أمام الحجرة الخاصة بإيميلي .. مفيش ولا مرة الشخصية الأصلية قدرت تشوف القرين .. لحد آخر حادثة . في احد الأيام في فصل ” تعليم الخياطة ” ، الطالبات كانوا مشغولين بدروسهم ، إيميلي في الحديقة اللي كانت معالمها واضحة من نوافذ الحجرة ، و المشرفة عن الفصل كانت سيدة أخرى .. المشرفة خرجت من الفصل ، و بعد دقائق ” إيميلي سيج ” دخلت وجلست مكانها على الكرسي .. في البداية الفتيات ملاحظوش حاجة ، لحد ما احدهم شاورت للخارج ، ” إيميلي ” جالسة عالكرسي ، و ” إيميلي ” اخرى مشغولة في الحديقة .. المرة دي احد الفتيات قررت تنهض و تلمس المعلمة الجالسة عالكرسي في الفصل .. ايدها عبرت من خلال الجسد الجالس ، ” القرين ” مصدرش منها اي رد فعل لكن الطالبة اصيبت بالهلع و جريت خارج المكان .. في الأيام التالية تغيبت عن المدرسة ، الأيام الي بعدها طالبتين سقطوا مصابين بالصرع ، و في خلال أيام الأهل بدؤوا يسحبوا بناتهم من المدرسة .. إدارة المدرسة مكانش قدامها خيار إلا فصل إيميلي .. كتير من الصحفيين حاولوا يوصلولها ، لكن ” إيميلي سيج ” اختفت .. اختفت فعلًا تمامًا غرفة مدفوعة الإيجار ، باب مغلق ، مفيش ايميلي .. هل ده كان له علاقة بالنسخة اللي كانت بتظهرلها ل7 أعوام متتالية ؟ محدش عارف .. الكيان اللي اطلقنا عليه ” القرين” ده عبارة عن ايه ؟ ، محدش عارف .. اطلقوا على الظاهرة دي اسم ” القرين_الشبح” أو ” doppelganger ” الظاهرة تعريفها بإختصار : ظهور نسخة اخرى منك ، في مكان تاني ، وانت حي مش ميت ، بتتصرف زيك تمامًا ، الناس بتشوفها لكن انت مبتشوفهاش ، لو حصل و شوفتها هتموت خلال ساعات قليلة .. معرفش النظرية صحيحة ولا لأ ، بس حادثة ” إيميلي سيج ” تعتبر احد الظواهر الكونية الغريبة اللي محدش لقى ليها تفسير منطقي حتى يومنا هذا ..
