عيون المجلس سياسية ،اقتصادية ،اجتماعية ،ليبرالية شاملة
ريمون عطا ..
سيادة الرئيس عبد الفتاح حسين خليل السيسى
رئيس جمهورية مصر العربية
تحية طيبة وبعد
ممكن ياريس نبلغ سيادتك رسالة بس ياريت يكون كلامى مش تقيل ولا فى شئ من السخافة وقلة أدب
اعذرني ياريس هكلم سيادتك بصراحة
الحاشية إلا حوالين سيادتك فاشلين فى إدارة بلد كاملة ولا حتى إدارة وخروج من الأزمة
الحل نشيل وزارة شريف إسماعيل كلها وليس تغيير وزارى محدود
اعتمد على وجوه سياسية جديدة الناس عندها ثقة فيها مش مصطفى بكرى وأحمد موسى ومرتضى منصور ومصطفى الجندى ياريس الناس دى وجوه محروقة عند الشعب المصرى تصدق ياريس واللهى العظيم لما بيطلع حد منهم بيطلع على التلفزيون الناس بتغير القناة وبتقول مطبلاتية اى نظام دى عالم سعرانة على الكراسى
ياريس لو سمحت ابعد الناس دى عنك علشان تنجح وتنجح معاك مصر ياريس وجود الناس دى جنبك بيبعد عنك شعبك والناس إلا بتحبك
تسمحلى ياريس بكلمة قبيحة بس انا عايز سيادتك تحطها فى الحسبان بدل ما تحسبها قلة أدب من مواطن قبيح
ياريس شعبيتك بتنزل واللهى العظيم ياريس اعتمد على رجال الجهاز الذى أتيت انت منه هولاء الناس يعرفوا معنى الوطنية وحب الوطن بجد
وبما انى فتحت الكلام وانا عارف انى عكيت الدنيا يبقى بالمرة بقى مجلس النواب كمان ليس مجلس شعب بل مجلس جاى ينفذ أوامر وتعليمات الحكومة
وطبعا وواصل لحضرتك يا فخامة الرئيس أن الحكومة نفسها ضدك وضد شعبك ياريس حكومة اسماعيل ومعاهم مجلس النواب كراسى فقط واللهى العظيم فقط مافيش واحد فيهم عنده المقدرة يحل أزمة بجد
بص ياريس من الاخر كدة انت لوحدك بتنحت فى الصخر لوحدك عايز البلد تقف من تانى بس لوحدك بس فشل الحكومة هيتنسب ليك مش للحكومة لأن محدش من الشعب انتخب الحكومة احنا انتخبناك انت وبنحبك انت
كلف حكومة جديدة تكون حكومة قادرة على الخروج من الأزمة إلا بتمر بيها البلد
ابعد عنك البطانة والمطبلاتية الفاشلين
قرب من شعبك تانى متخليش بينك وبين شعبك وسيط ولما تحب يكون عندك وسطاء بينك وبين شعبك
خليهم قيادات عسكرية محبوبة للشعب علشان شعبيتك تعلى ويتقال الرئيس واخد جنبه قيادات عسكرية بتنقله الصورة صح مش بكرى والجندي وموسى بتوع كله تمام ياريس
احب اقولك ياريس كمان ان الحالة مش تمام
اسف ياريس انى مواطن قبيح وصل الصورة بكل صراحة وبلغ سيادتك بحالة شعبك ونطق بلسانه
امضاء مواطن بلغ رسالة للرئيس.
