من وحي الأدب والخيال قصص وحكايات إسمها..مصريات إقرأها مع أحمديات

  من وحي الأدب والخيال قصص وحكايات إسمها...مصريات إقرأها مع ... أحمديات حكاية الكوسة... وسّع للكوسة! إيه حكاية الكوسة اللي بقت رمز للواسطة والمحسوبية في حياتنا؟ زمان كانت الكوسة من الخضراوات سريعة التلف وبتحكي الروايات الشعبية إن التجار كانوا بيقفوا في طابور طويل قدام السوق كل واحد شايل بضاعته ومستني دوره من ساعات واللي واقف من الفجر لسه مستني يدخل وفجأة يظهر تاجر الكوسة شايل بضاعته فينادي المسؤول وسّعوا يا جماعة... الكوسة وصلت! دخّلوه الأول! فالتجار يبصوا لبعض في ذهول إيه الحكاية؟ إحنا واقفين من الفجر! يرد عليهم المسؤول بكل بساطة معلش يا جماعة دي كوسة. ولو استنت دورها هتبوظ! يعني اللي واقف بالساعات يستنى، واللي لسه واصل يدخل من الباب الكبير! ومن هنا ارتبطت الكوسة بفكرة الإستثناء وتجاوز الدور وبقينا نقول. «إيه ده هي كوسة؟!» «وسّع للكوسة!» وبقت الكوسة رمز للواسطة والمحسوبية وتقديم ناس على ناس من غير وجه حق. شوفت بقى أصل الحكاية. "تحياتى ومن عندياتى"