عيون المجلس سياسية ،اقتصادية ،اجتماعية ،ليبرالية شاملة
إسراء محمـد
في كتاب العلوم بتاع سنة رابعه ابتدائي كان أول درس هو إن مقومات الحياة للإنسان هي الماء والهواء والغذاء ، ونفس ذات الشخص لما يوصل لرابعة جامعة بيكتشف إن مقومات الحياة حاجه تانيه أهم بكتير وهي الأمل. الذى يعتبر أكسير الحياة .
الإنسان علشان يعيش بيحتاج يطمن إن في بكره. يطمن أن لسه في وقت. أن لسه في خير ولسه في فرصة. الأمل هو الميه اللي بتروي عطش الأيام . ومن غيره بيصاب الإنسان بأشهر مرض نفسي وهو الإكتئاب والإحباط اللي بيوصلوا الشخص للإنتحار، لأنه مش شايف أي لازمه للحياة ولا وجود للأمل.
(أمل ايه؟ أمل إتخطفت ياعم) .. من أبشع العبارات اللي بتتقال يوميا ،لأن مش بس فيها جرعة إحباط كافية لتدميرك ،لا ده فيها إنكار لقدرة ربنا إنه قادر يحقق أحلامنا وإنه قادر يغفرلنا. دايما إفتكر وخليك واثق في إن (لسه ممكن) . أوعى تيأس من رحمة ربنا مهما حصل. طالما لسه عايشين يبقى هنفضل نغلط وهنفضل نتوب وربنا هيفضل يغفرلنا. وده قمة الأمل اللي ربنا بيدهولنا يجب أن نعتمد سياسة . يبقى الأمل مااستمرت الحياة .. .
إزاي تموت إنسان وهو لسه عايش ؟ جمله اتقالت في مسلسل 30 يوم والاجابه من وجهه نظري هي فقدان الامل. عايز تموت حد بجد إديه أمل وفجأه خده منه تانى . دي قمه البشاعه لأن الروح هي اللي بتموت وبتموت بجد. لأن الإنسان مش بيفقد الأمل بسهوله ومعنى إنه ييأس يبقى طاقته كلها فعلا استنزفت في الآمال .فبيموت بالبطئ وبيكون عايش ميت بيتنفس من غير روح، مافيش طعم لأي حاجه ولا لون ،الدنيا أبيض في أسود. ماينفعش تكون أسود فى أسود !
في نعم كتير في حياتنا مش واخدين بالنا منها بالرغم إنها مهمه جدا وزيها زي أي نعمه مش بنحس بقيمتها إلا لما نفقدها .الأمل من أهم نعم ربنا علينا، بس أوعى تتحول لنقمه لأن الحياه مش مضمونه والواقع دايما متغير. يعني ماتضمنش إنك عايش على طول فتسوف وتأجل كل حاجه لبكره. يعني من الآخر إعمل حسابك أن ممكن النفس اللي داخل ما يخرجش . وتلاقى وقتك فى الدنيا خلص . وكتاب حياتك إنتهت صفحاته .عيش بالأمل وسيبها لله !
