عيون المجلس سياسية ،اقتصادية ،اجتماعية ،ليبرالية شاملة
كتب: أحمد شعبان
بعد تعزيه صلاح لملكة انجلترا والذي أثار ضجة كبيرة عبر مواقع التواصل الاجتماعي نشر الكاتب محمد أمير عبر حسابه عدد من الآثار المصرية التي خرجت بشكل غير شرعي من مصر.
قال الكاتب محمد أمير (الخديوي) عبر حسابه الشخصي في فيسبوك: “بعيدا عن “حجر رشيد ورأس نفرتيتي”، وبعيدا عن المسلات والمعابد، فا انتا عندك برة ملايين القطع الاثرية المصرية “متحف بريطانيا لوحده بيمتلك ١١٠ الف قطعة” بتزين متاحفهم وقصورهم، اغلبهم خرجوا بطرق غير شرعية او عن طريق الشراء او الاستعمار”.
تمثال المهندس حم إيونو :
وتطرق الخديوي في حديثه على أحد المعالم المصرية وقال: “تمثال المهندس المسئول عن بناء الهرم الاكبر نفسه، الراجل اللي صمم وحسب ودرس جيولوجية الارض وحط الاستراتيجية بتاعت البناء، حفيد الملك سنفرو من الاسرة التالتة المصرية، وهو الاول والاخير من نوعه من حيث طريقة تصميمه بشكل واقعي وكمان لانه الوحيد اللي من عصر خوفو لحد غير خوفو”..
وأضاف أمير: “اكتشفه العالم الالماني “هيرمان يونكر” سنة ١٩١٢م في سقارة في المصطبة اللي اتدفن فيها، وبدل ما يبعته على مصر راح مهربه على متحف هيدسهايم في المانيا”.
الرأس الأخضر:
عنها كتب أمير: “راس مصنوعة من البوراق “الحجر الرملي” لاحد الكهنة المصريين من العصر المتأخر، معمولة بدقة غريبة ومهتم حتى بالخطوط والتجاعيد، الدقة اللي مصنوعة بيها الراس دي خلت علماء المصريات يفترضوا ان مصمم التمثال غالبا درس تشريح قبل اليونان، ومفيش منها غير راس برونزية شبيهة موجودة في المانيا”.
وتابع المدون: “سنة ١٨٥٨م الامير “نابليون جوزيف شارل بول بونابارت” ابن عم نابليون التالت كان عايز يزور مصر، فا سعيد باشا قاله حبيبي عايز تيجي يبقا تيجي تنقب عن الاثار بقا مهي حفلة، وعشان ميتعبوش كلف “اوجوست مارييت” انه يعرف الامير نابليون هيتمشى فين، وفي الحتة اللي بيتمشى فيها دي ينقب عن الاثار واللي يلاقيه يدفنه اقرب عشان الامير ميتعبش، فاكتشف الراس، القصة بقا انه مجاش ولغى الرحلة، فا سعيد باشا لفهاله لفة هدايا وبعتهاله، وموجودة النهاردة في متحف بوسطن في امريكا”.
تمثال عنخاف:
فوفقا لأمير فهو تمثال جيري ملون بيصور راجل في عهد خفرع، معمول بشكل واقعي بعكس التصوير اللي كان بيجمل صورة اصحابه، وده مخليها نادرة ان قليل لما كان الفنان المصري بيصور الراجل على طبيعته مش في صورة مثالية.
وأَضاف أمير: سنة ١٩٢٥م جت حملة استكشافية مشتركة بين متحف الفنون الجميلة في بوسطن وجامعة هارفارد، واكتشفوا مقبرة حتب حرس، فا عشان المجهود اللي عملوه اخدوا التمثال ده اللي هوا ناخد هدية لنفسنا بقا، وموجود دلوقتي في متحف الفنون الجميلة في بوسطن.
جدير بالذكر أن المصري محمد صلاح قد قام بالتعزية في الملكة البريطانية إليزابيث الثانية ما أثار ضجة كبيرة في مواقع التواصل الاجتماعي حول تصرف المصري.
