عيون المجلس سياسية ،اقتصادية ،اجتماعية ،ليبرالية شاملة
ايه مدحت
أكيد مر علينا وقت اختبرنا فيه قدرة تحملنا و قوة تحمل إللي حوالينا فيه كمان .. مانكرش إن رفعنا ناس وادينا ليهم حجم اكبر من حجمهم بكتير جدا .. الشدة بقي بتيجي عشان تضع كل إنسان في حياتنا في مكانته الصحيحة واللي يستحقها فعلا .. إختبار صغير اوي بنمر بيه ممكن يخلينا ننهار نفسياً و جسدياً بس له جانب إيجابي كبير جدا ألا وهو فرز الاشخاص الموجودين في الحياة .
وجود ناس كتير حوالينا شئ جميل بس وجود ناس ميستحقوش القرب دا شي مش جميل خالص .. أزمات الحياة بتيجي عشان تختارلك الاشخاص الصح عشان تقربهم اكتر و تبعد اللي ميستحقوش او علي الاقل تعرفك قيمتهم كويس عندك .. ياما ناس مبينين ليك انهم مايقدروش علي البعد عنك واللي يبينلك انه يفديك بنفسه وهما ف الاصل بيجيبوا ف سيرتك ف ضهرك .
النفاق من أبشع الصفات البشرية على الإطلاق كون شخص يقدر يلون نفسه ويظهرلك حب و من جواه مليان كره و شر . ده شئ مخيف .. الصحبة الخيرة فعلا هي اللي تبقي واثق انه مهما الدنيا جابت مشاكل بينكم هيفضلوا طول عمرهم حافظين العشرة و صاينين الايام الحلوة اللي عدت .
مش كل الناس قلبهم فيه خير بس حقك انك تختار اللي قلوبهم عمرانة بالحب والخير وتبعد عن النفوس الخبيثه اللي بكذا وش .. و زي ما رسولنا الكريم قال “شر الناس ذو الوجهين” .. فالبعد عنهم غنيمة و خسرانهم مكسب .. ركز ف رسايل ربنا ليك وفي الشدة اللي بتيجي تخليك تشوف مين جنبك ومين عليك و اعرف إن ربنا كريم مابيديش للإانسان اختبار إلا عشان يفرزلك اللي حواليك لمصلحتك.و ربنا يخليكى ياشدة !
