حبي نفسك الاول..

هيام مهدى

.. كتير بالاقي إن الأغاني وخصوصا أغاني البنات بتعبّر عن حالتنا كبنات في أوقات كتيرة، وممكن تلمس جوانا حالة نكون حاسين بيها قوي في الوقت الحالي أو مرت علينا في يوم من الأيام.. بس أكتر حالة بتخليني أستغرب وأسأل نفسي “هي البنات بتعمل في نفسها كده ليه؟” زي مثلا إن في بنات لما بتحب أو ترتبط بأي شخص ارتباط رسمي أو عاطفي.. بيكون عندها استعداد إن شخصيتها تدوب جوه شخصية حبيبها.. وتبقى آرائها ووجهات نظرها عن كل حاجة في الحياة نفس آرائه ووجهات نظره.. وممكن كمان تلغي شخصيتها ورأيها تماما ويكون هو الآمر الناهي في كل حاجة.. وتبقى البنت من دول بتتكلم على مزاجه وتلبس على مزاجه، وتصاحب الناس اللي على مزاجه، وتبقى آرائها هي نفس آرائه وكلامها نفس كلامه وتحب الحاجات اللي بيحبها وتكره الحاجات اللي بيكرهها، ومش بعيد كمان يكون هو حاطط لها قايمة تعليمات لازم تمشي عليها بالحرف الواحد.. والغريب إنها في وسط كل ده بتبقى في قمة سعادتها.. تبقى عاملة بالظبط زي البنت بطلة أغنية دنيا سمير غانم الجديدة “واحدة تانية خالص” اللي بتقول فيها: “جرالي إيه من ساعة لما جاني.. ده أنا بخاف لا في ثانية يروح بعيد ده أنا بقيت بالليل بسمع أغاني.. اللي قديم واللي نازل جديد ده أنا بقيت بلبس على كيفه.. مبقولش لأ على حاجة بيعوزها وبقيت بشوف كل اللي بيشوفه.. والتعليمات بالحرف أنفذها ما هو خلاص سيطر على حياتي.. ومفيش ولاد غيره بكلمهم لأ وكمان بينقي صاحباتي.. طب أعمل إيه مش عاجبه معظمهم” الأغنية دي قد إيه بتوصف حال بنات كتير حوالينا.. بنات فاهمة الحب غلط.. من كتر احتياجها لوجود نصها التاني في حياتها وانتظارها له كتير أول ما بتلاقيه بتبقى عاملة كده بالظبط.. بتنسى نفسها وتتنازل عن شخصيتها في سبيل بس إنها ترضيه وتحافظ عليه.. بس الفكرة إن الحب عمره ما كان كده.. الحب إنك تكوني انتي بكل ما فيكي.. وإن خطيبك أو حبيبك يحبك كده زي ما انتي.. يتقبلك بكل ما فيكي.. مش يبقى عاوز يعمل منك شخصية تانية لصورة معينة مرسومة في خياله.. وبالحب والمشاركة والتفاهم هتقدروا تفهموا بعض أكتر وتعملوا الحاجات اللي بتريحكوا انتوا الاتنين.. أهم حاجة متغيريش آرائك أو طباعك أو تمحي شخصيتك عشان ترضي أي حد.. ده كله عشانك انتي عشان متجيش في يوم تفوقي من الحلم اللي كنتي معيشة نفسك فيه على إنك بقيتي حاسة إنك مش لاقية نفسك.. ولا عارفة تاخدي قرار لوحدك.. ولا عارفة تروحي في حتة لوحدك.. وتيجي تقولي زي البنت بطلة أغنية فيروز كراوية “بره مني”: ” عايزة أرمي بره مني كل شيء يربطني بيك عايزة ألقى جوه مني روحي اللي نسيتها فيك” لو عايزة تتحبي بجد مش هاقولك غير حبي نفسك الأول.. وإياكي تتنازلي عن شخصيتك أو تسيبي روحك تضيع منك..