لحظة صدق .. هل يمكن شراء السعادة؟! طب بكام ومنين؟!

وليد كساب

السعادة نسبية وقد تكون موجودة واحتمال كبير تكون أصلا خيال علمي!  هذا. لأننا جميعا نتحدث عنها ونتمناها ونحلم بها..  ولكنها غالبا لا تكون متاحة.  لهذا نقول انها نسبية..  يعني ممكن نحس بيها مع أكلة حلوة مثلا.  وتذهب بانتهائها.  أو في مبلغ مالي يأتيك فجأة ودون توقع.

وبرضه تذهب بتبخر هذا المبلغ في فواتير كهربا او مصاريف العيال.  ومايسعدك بشدة مثل فوز فريقك المفضل مثلا قد يكون سبب تعاسة غيرك من انصار النادي المنافس!!  وهكذا. نجد أن تعبير السعادة نسبي ويختلف من بني آدم للتاني. ! وعلي مر العصور والأزمنة لم يتوصل أحد علماء السيكولوجي أو خبراء علم النفس لتعريف محدد لشعور السعادة. .. لتظل دائما لغز محير وشئ غامض. نحلم به ونتكلم عنه من غير مانعرفه.

ربما تبقي الميزة الكبري لهذه القيمة. هي أنها تعطينا الأمل وتجعل حياتنا ممكنة..  فنحن نشقي ونتعب ونبذل الغالي والرخيص حتي نصل للسعادة. .. وهكذا تستمر الحياة وتدور عجلات الدنيا.  فتسمع هذا الأب يخاطب اولاده.  ان شاء الله حاخليكم أسعد عيال في الدنيا.  وتري ذاك الشاب يسبل عيونه لخطيبته وهو يقول. . أنا ربنا خلقني عشان اسعدك. .. وتكذب هذه المرأة علي رجلها حينما تقول له انت سر سعادتي..  وتستمر أكاذيب البشر ووعودهم وكلها تدور حول السعادة..

ونذهب لجانب رجال الدين لتري آراء مختلفة تماما..  فهم دائما يصدرون وعودهم للناس بأنه مش مهم خالص تكون سعيد في الدنيا..  لأن المهم انك تبقي سعيد في الآخرة. !! وعندما تستوقفه متسائلا..  طيب يامولانا ماينفعش ناخد حتة سعادة صغيورة خالص في الدنيا والباقي يبقي في الآخرة؟!

يبتسم في وجهك وممكن يطبطب عليك ومايقولش رد علي سؤالك..  لنفس السبب. وهو ان مسألة السعادة دي مش مفهومة بالظبط. !! وهل هي فلوس ولا صحة ولا مركز ولا شهرة ولا إيه بالظبط. ؟!  وطبقا لكل هذا فنحن لن نسأل عن السعادة ولا أين توجد وممكن نشتريها ولا لأ. ولا هي ممكن تبقي بكام وياتري غليت زي كل حاجة؟

طب حيطبق عليها ضريبة القيمة المضافة؟ وكثيرا من الأسئلة التي لا تجد إجابه. !!  وعشان كل ده نقدر نقوللك ببساطة خد اللي تقدر تاخده من السعادة أو ما تظن انها السعادة. .. بأي حاجة بسيطة. . ساندوتش حلو مع حتتين مخلل ووراهم كوباية شاي وسيجاره أو لمة حلوه مع مجموعة من أصدقائك المخلصين..

أو حتي قعدة في مكان حلو مع نفسك بعيد عن الدوشة. !!  وإقنع نفسك انك سعيد. ولو حتي. حكمت روح السجل المدني وغير اسمك وخليه. سعيد.  .. عشان تبقي رسمي راجل. سعيد. ولو واحدة ست. .. بسيطة برضه غيري اسمك وخليه. سعيدة.  !!  بالذمة فيه أسهل من كده. ؟! ونبقي كلنا مواطنين سعداء. ونعمل وزارة للسعادة والسعداء زي الإمارات. !! ولله الأمر من قبل ومن بعد. !!